“ Gilan Kənd Təsərrüfatı Qrupu” ilə Azərbaycan Dövlət Aqrar Universiteti və Aqrar Elm və İnformasiya Məsləhət Mərkəzi arasında əməkdaşlıq haqqında Anlaşma Memorandumu imzalanıb

Azərbaycan Respublikası Prezidentinin 2016-cı il 6 dekabr tarixli 1138 nömrəli Fərmanı ilə təsdiq edilmiş “Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”ndə və milli iqtisadiyyat və iqtisadiyyatın əsas sektorları üzrə digər strateji yol xəritələrində müəyyən edilmiş vəzifələrin yerinə yetirilməsi sahəsində Azərbaycan Respublikası Kənd Təsərrüfatı Nazirliyi üzrə Tədbirlər planında qeyd edilən bəzi vəzifələrin yerinə yetirilməsi məqsədi ilə 9 mart 2017-ci il tarixdə “GİLAN Agricultural Group” ilə Azərbaycan Dövlət Aqrar Universiteti  və Aqrar Elm və İnformasiya Məsləhət Mərkəzi arasında əməkdaşlıq haqqında Anlaşma Memorandumu imzalanıb.

Anlaşma Memorandumunu Azərbaycan Dövlət Aqrar Universitetinin rektoru İbrahim Cəfərov, Aqrar Elm və İnformasiya Məsləhət Mərkəzinin baş direktoru Rəsul Balayev və “GİLAN Agricultural Group”un İnkişaf üzrə Baş direktoru Eldar Cəfərov imzalayıb.
Anlaşma Memoran- dumunun əsas məqsədi aqrar təhsil müəssisələri ilə kənd təsərrüfatı məhsulları istehsalçıları və emalı müəssisələri arasında əməkdaşlığın gücləndirilməsi, istehsal vasitələri təchizatçıları, emal müəssisələri və maliyyə institutları vasitəsilə istehsalçılara informasiya məsləhət xidmətlərinin göstərilməsi imkanlarının genişləndirilməsi, sektorlar üzrə spesifik tələblərin qarşılanmasına dəstək verilməsi, o cümlədən Azərbaycanın kənd təsərrüfatı sahəsində dövlət və özəl sektor arasında əməkdaşlığı gücləndirmək, kənd təsərrüfatı sahəsində kadr hazırlığı prosesinin keyfiyyətini və səmərəliliyini yüksəltmək və bu sahədə fəaliyyətləri birgə koordinasiya etməkdir.

Anlaşma Memorandumuna əsasən “GİLAN Agricultural Group” Azərbaycan Dövlət Aqrar Universiteti və Aqrar Elm və İnformasiya Məsləhət Mərkəzi ilə birgə kadr hazırlığı, həmçinin məzunların işlə təminatı, o cümlədən aqrar elmi-tədqiqat müəssisələrinin bu sahədə əldə etdikləri elmi nailiyyətlərin təsərrüfatlarda tətbiqi imkanlarının genişlənməsinə şərait yaradacaqdır. Bununla yanaşı, Aqrar Elm və İnformasiya Məsləhət Mərkəzi və ADAU-nun mütəxəssisləri də “GİLAN Agricultural Group”un mütəxəssisləri və əməkdaşlıq etdiyi təsərrüfatların nümayəndələri üçün təlimlər keçirəcək, bu istiqamətdə əldə olunmuş nailiyyətlər barədə məlumat verəcəklər.

Tədbirdə çıxış edən nazir müavini Seyfəddin Talıbov son ildə Aqrar Elm Təhsil və İnformasiya sahəsində həyata keçirilən institusional islahatlar, son iki ildə Azərbaycan Dövlət Aqrar Universitetinin maddi-texniki bazasının möhkəmlənməsi, yeni müasir laboratoriyaların və tələbə yataqxanalarının istifadəyə verilməsi, tədrisin keyfiyyətinin artırılması sahəsində görülmüş işlər və innovativ texnologiyaların fermerlərə ötürülməsi barədə ətraflı məlumat verib və dövlətlə özəl sektor arasında sıx əlaqələrin qurulmasında bu memorandumun əhəmiyyətini vurğulayıb.

Sonda tərəflər arasında kadr hazırlığına dair geniş fikir mübadiləsi aparılıb.

  

http://agro.gov.az/641-glan-knd-tsrrfati-qrupu-l-azrbaycan-dvlt-aqrar-unverstet-v-aqrar-elm-v-nformasya-mslht-mrkz-arasinda-mkdaliq-haqqinda-anlama-memorandumu-mzalanib.html